Суд Маладзечанскага раёна асудзіў 37-гадовага мясцовага жыхара на 1,5 года пазбаўлення волі за катаванне 14-гадовай дачкі, паведамілі ў прэс-службе пракуратуры.
Падчас судовага следства выявілі, што нецвярозы абвінавачаны ўвечары 8 лістапада 2023 года збіў сваю 14-гадовую дачку за тое, што яна пайшла гуляць, не паведаміўшы пра гэта яму.
Экспертыза паказала, што ён зрабіў дзяўчынцы не менш за дзевяць траўмавальных уздзеянняў рукамі па галаве, тулаве і верхніх канечнасцях, чым нанёс ёй менш цяжкія цялесныя пашкоджанні.
На судовым паседжанні мужчына прызнаў віну часткова. Ён адмаўляў, што ўдарыў столькі разоў і што нанёс дачцэ цялесныя пашкоджанні шляхам катавання.
Суд прызнаў яго вінаватым па ч. 2 арт. 149 КК (Наўмыснае нанясенне менш цяжкага цялеснага пашкоджання, якое выклікала доўгі разлад здароўя на тэрмін да чатырох месяцаў, здзейсненае спосабам, які мае характар катавання) і асудзіў на 1,5 года пазбаўлення волі з адбываннем пакарання ў папраўчай калоніі ва ўмовах агульнага рэжыму.
Прысуд не ўступіў у законную сілу, можа быць абскарджаны і апратэставаны ў апеляцыйным парадку.
