Беларусы рвуцца па Gucci, Versace і іншую гадасць, а трэба насіць сваё. Пра гэта Аляксандр Лукашэнка заявіў на «Дажынках-2024» у Клімавічах, піша яго прэс-служба.
«Людзі ўсё больш і больш да натуральных тканін схіляюцца. Акрамя беларусаў. Беларусы не разумеюць. Беларусы рвуцца па Gucci, Versace і іншую гадасць. Сваё трэба насіць. Свае тканіны. У нас ёсць усё. Носіце сваё і прывучайце дзяцей да гэтага», — падкрэсліў Лукашэнка, кажучы пра якасць і натуральнасць беларускіх вырабаў.
Не ўпершыню
У пачатку гэтага года Лукашэнка на нарадзе па пытаннях адукацыі на сустрэчы з чальцамі рэспубліканскага савета рэктараў ВНУ папракнуў моладзь у імкненні апранацца ў дарагія брэндавыя рэчы.
«Апрануцца нашая моладзь хоча ух як. Я, прэзідэнт, і тое так не апранаюся, як некаторыя звычайныя маладыя людзі. Называюць гэтыя імпартныя брэнды і іншае… Я пра такія не чуў, а калі і чуў, дык толькі за імя там шалёныя грошы плацяць. Нашыя нармальна ўжо шыюць, не, трэба так. Навошта табе гэтая ануча?» — сказаў ён.
Пры гэтым, на ягоную думку, калі ў Беларусі малады чалавек не апранецца як «тэледзіва», то ўжо кепска жыве. Ён сказаў, што пра гэта трэба рэгулярна казаць маладым. У іншым выпадку такімі тэмпамі можна «лёгка даскакацца» да Украіны.
У 2022 годзе Лукашэнка прызнаўся, што носіць адзенне выключна беларускай вытворчасці. Ён назваў бядой сітуацыю, калі ў жыхароў краіны «вочы гараць ад выгляду імпартнай прадукцыі».
І схлусіў.
Што носіць сам Лукашэнка
Так склалася, што частку сваіх модных вобразаў Аляксандр Лукашэнка дэманструе падчас палявых работ — то сяўбы, то касьбы, то ўборкі.
У 2008 годзе Лукашэнка пайшоў на поле і з гэтай нагоды апрануўся ў шэрыя штаны, белую кашулю, гальштук з прынтам і скураны рэмень. Моднікі тут жа распазналі, што гэта рэмень французскага брэнда HERMES, каштуе такі каля 800 даляраў.
У 2009 годзе Лукашэнка даваў інтэрв'ю Міхаілу Гусману для праграмы «Формула ўлады» і паказаў сваё ўменне касіць траву. Ён быў апрануты ў шэры світшот NIKE на цёмна-сінюю футболку.
У жніўні 2011 года ён паехаў у Шклоўскі раён на бітву за ўраджай на камбайне «Палессе GS16». Там ён засвяціўся ў кашулі-пола маркі CORNELIANI. У Мінску такая адзежына на той момант каштавала прыкладна 130 даляраў.
А ў верасні 2018-га, пасля заканчэння працоўных мерапрыемстваў, Лукашэнка далучыўся да ўборкі ўраджаю бульбы і бахчавых на сваім прысядзібным участку. На афіцыйных здымках відаць, што Аляксандр Лукашэнка прыбірае бульбу ў чорных штанах і белай футболцы. Калі прыгледзецца, можна разабраць лагатып фірмы-вытворцы і прачытаць літары пад выявай. Гэта футболка вядомай французскай маркі LACOSTE з калекцыі, створанай сумесна з сербскім тэнісістам Новакам Джокавічам. На афіцыйным сайце брэнда футболка каштавала 41,99 даляра (плюс 8 даляраў дастаўка), без зніжкі яна б абышлася ў 60 даляраў. Мінскія інтэрнэт-крамы прадавалі гэтую мадэль за 112 рублёў (53 даляры).
Таксама адзначым, што ў Лукашэнкі ёсць калекцыя дарагіх гадзіннікаў. Сярод іх — Calatrava 5120j ад швейцарскага люксавага брэнда Patek Philippe.